SON XƏBƏRLƏR
21 Avqust 2019
20 Avqust 2019
19 Avqust 2019
17 Avqust 2019
16 Avqust 2019
Bakıda keçiriləcək Avropa Gənclər Yay Olimpiya Festivalının start götürməsinə 200 gün qalır
İDMAN 08:17 / 03.01.2019
Bu ilin iyulunda Bakıda keçiriləcək Avropa Gənclər Yay Olimpiya Festivalının start götürməsinə 200 gün qalır.

AZƏRTAC xəbər verir ki, festivalın açılış mərasimi iyulun 21-də təşkil olunacaq. İyulun 27-dək davam edəcək mötəbər idman turnirinə Avropanın 50 ölkəsindən 2 mindən çox idmançı və 1500-dən artıq nümayəndə qatılacaq. Yarışlar idmanın on növü (bədii gimnastika, atletika, basketbol, velosiped, həndbol, cüdo, üzgüçülük, tennis, voleybol, güləş) üzrə 12 idman qurğusunda keçiriləcək. Festivalın təşkilinə 2500-dən çox könüllü cəlb olunacaq.

Avropa Gənclər Yay Olimpiya Festivalının 2019-cu ildə Bakıda keçirilməsinə hazırlıq işləri ilə əlaqədar Prezident İlham Əliyevin 2018-ci il 15 may tarixli Sərəncamı ilə Təşkilat Komitəsi yaradılıb.

Mötəbər yarışın başlanmasına bir il qalması münasibətilə ötən ilin iyulunda festivalın rəsmi loqosu təqdim edilib. Loqo dostluq, ədalətli oyun və tolerantlıq ruhunu gücləndirən müasir, dinamik və çevik brendi əks etdirir. Bakının irs və mədəniyyətini (od və qədim Azərbaycan naxışı olan butanı), birlik və dostluq konsepsiyalarını özündə ehtiva edən loqo, eyni zamanda, Azərbaycan paytaxtının möhtəşəm müasir memarlıq nümunələrini (Alov qüllələri və Heydər Əliyev Mərkəzini) təsvir edir. Parlaq rəngləri canlandıran bu loqo yarışlara qatılacaq hər bir iştirakçının müsbət enerjisi və Bakının çoxşaxəli gözəlliyini təsvir etdirən əhatəli çalarlar palitrasından ibarətdir.

Avropa Gənclər Olimpiya Festivalının ideyası gənclərə Olimpiya hərəkatını tanıtmaq, Olimpiya dəyərləri və ideallarını aşılamaq məqsədilə Avropa Olimpiya Komitəsinin (AOK) sabiq prezidenti Jak Roq tərəfindən 1990-cı ildə irəli sürülüb. Festival 14-18 yaşlı avropalı gənc atletlər üçün yüksək səviyyəli çoxnövlü idman turniridir. Birinci festival 1991-ci ildə Brüsseldə keçirilib. Bu idman tədbiri iki ildən bir qışda və yayda təşkil edilir. Beynəlxalq Olimpiya Komitəsinin himayəsi ilə AOK tərəfindən keçirilən festivala ev sahibliyi edən ölkə bütün yarışlarda təsnifat raundu olmadan iştirak hüququ qazanır.

Regioninfo.az ©2019 Bütün hüquqlar qorunur
Təsisçi: Demokratik Cəmiyyətin İnkişafına Yardım
İctimai Birliyinin sədri Əsgər Məmmədov
Tel: 012 566 28 48
Mobil: 055 485 68 08
İSTİFADƏ QAYDALARI Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir.