SON XƏBƏRLƏR
16 Iyun 2019
15 Iyun 2019
14 Iyun 2019
13 Iyun 2019
28 May - Respublika Günü İstanbulda qeyd edilib
CƏMİYYƏT 09:41 / 26.05.2019
28 May - Respublika Günü və Azərbaycan diplomatik xidmətinin 100 illiyi münasibətilə ölkəmizin İstanbuldakı Baş Konsulluğunun təşkilatçılığı ilə təntənəli tədbir keçirilib.

Tədbir Azərbaycanın və Türkiyənin dövlət himnlərinin səsləndirilməsi ilə başlayıb.

Azərbaycanın İstanbuldakı baş konsulu Məsim Hacıyev çıxış edərək Azərbaycan Xalq Cümhuriyyətinin yaranması və fəaliyyəti barədə iştirakçılara məlumat verib. Baş konsul XX əsrin sonunda dövlət müstəqilliyimizin bərpası üçün yaranmış tarixi şəraitdən, təcavüzkar Ermənistanın ölkəmizə qarşı işğalçılıq siyasətinin ağır nəticələrindən və ümummilli lider Heydər Əliyevin xilaskarlıq missiyasından danışıb. O, Prezident İlham Əliyevin rəhbərliyi ilə Azərbaycanın hərtərəfli inkişaf etdiyini, dünyanın bir çox ölkələri ilə bütün sahələrdə uğurlu əməkdaşlıqlara imza atıldığını qeyd edib. Ulu Öndərin "Azərbaycan və Türkiyə bir millət, iki dövlətdir” fikrini xatırladan baş konsul qardaş ölkələrimizin və xalqlarımızın hər zaman bir-birinin yanında olduğunu bildirib. Baş konsul TANAP layihəsinin strateji əhəmiyyətindən və bölgəmizin enerji təhlükəsizliyindəki rolundan danışıb. "STAR" layihəsi barədə danışan M.Hacıyev Türkiyədə bu layihəyə ən böyük xarici yatırımın da məhz Azərbaycan tərəfindən edildiyini bildirib.

Baş konsul Azərbaycan diplomatik xidmətinin tarixi barədə də iştirakçılara məlumat verib.

İstanbul valisinin müavini İsmayıl Gültəkin Azərbaycanın müstəqilliyinin qorunmasını və sürətli inkişafını türk dünyası üçün əvəzolunmaz sərvət kimi dəyərləndirib. O, Azərbaycan və Türkiyə arasında əsrlərboyu davam edən qardaşlıq münasibətlərinin dünya ölkələri üçün nümunə olduğunu bildirib.

Tədbir çərçivəsində ümummilli lider Heydər Əliyevin həyat və fəaliyyətinə, Prezident İlham Əliyevin yürütdüyü siyasətə dair kitablar, "İRS" jurnalı, Ermənistanın işğalçı siyasəti barədə nəşrlər iştirakçılara təqdim olunub.

Mərasim Azərbaycan musiqilərindən və rəqslərindən ibarət konsert proqramı ilə davam etdirilib. (AZƏRTAC)

Regioninfo.az ©2019 Bütün hüquqlar qorunur
Təsisçi: Demokratik Cəmiyyətin İnkişafına Yardım
İctimai Birliyinin sədri Əsgər Məmmədov
Tel: 012 566 28 48
Mobil: 055 485 68 08
İSTİFADƏ QAYDALARI Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir.